პარლამენტში  საგადასახადო კოდექსში ცვლილებების  კანონპროექტი დარეგისტრირდა. როგორც ბიუროს სხდომაზე პარლამენტის თავმჯდომარემ დეპუტატებს განუცხადა, ამ ცვლილებების კანონპროექტის განხილვა და მიღება მოკლე დროში მოუწევთ.

"მნიშვნელოვანია ცვლილებები საგადასახადო კოდექსში, რაზეც ირაკლი კოვზანაძე მუშაობდა მთვრობასთან ერთად. ეს არის ანტიკრიზისული პაკეტი, რომელიც უკვე შემოსულია და ჩვენ ძალიან მოკლე დროში მოგვიწევს მუშაობა. აქ არის მთელი რიგი მნიშვნელოვანი გადაწყვეტილებები და ღონისძიებები, რომელიც ანტიკრიზისული რეაგირების ფარგლებში შევიმუშავეთ. მათ შორისაა 750 ლარამდე შემოსავლის მქონე ჩვენი თანამოქალაქეების გათავისუფლება საშემოსავლო გადასახადისგან. ასეთი ტიპის შეღავათები არის არაერთი ამ პაკეტში და გთხოვთ მოკლე დროში, მაგრამ, ასევე დეტალურად განვიხილოთ და დროულად მივიღოთ ეს ცვლილებები", - განაცხადა არჩილ თალაკვაძემ.

შეგახსენებთ, მთავრობის ანტიკრიზისული ეკონომიკური გეგმა საგადასახადო შეღავათებს ითვალისწინებს. კონკრეტულად კი, კერძო სექტორში დაქირავებული პირების 1 500 ლარამდე ხელფასი, 750 ლარის ოდენობაზე თავისუფლდება საშემოსავლო გადასახადისგან 6 თვის განმავლობაში. შეღავათის მაქსიმალური ოდენობა თითოეულ სამუშაო ადგილზე 150 ლარია.