ანალიტიკოსი ზაალ ანჯაფარიძე სუს-ის მიერ გავრცელებულ ინფორმაციას, რომელშიც ნათქვამია, რომ „სახელმწიფო ინტერესების საზიანოდ, უცხო ქვეყნიდან მართულ და საქართველოდან მხარდაჭერილ დისკრედიტაციულ საინფორმაციო კამპანიასთან დაკავშირებით, საბოტაჟის მუხლით გამოძიება დაიწყო“, სოციალურ ქსელში ეხმიანება.
როგორც ანჯაფარიძე აღნიშნავს, საქართველოში მოქმედი, თუმცა უცხოეთში რეგისტრირებული და უცხოური პატრონაჟის ქვეშ მყოფი მედია უკვე წლებია ეწევა საქართველოს გაშავების კამპანიას. ანალიტიკოსის თქმით, სუს-ის მხრიდან ადრე იყო საჭირო მათი გამოვლენა, მაგრამ მთავარია, რომ ამ რეაგირების შედეგად, მივიღოთ კონკრეტული გაზომვადი შედეგი, რომელიც გვეტყვის, რომ პრობლემა მოხსნილი ან მინიმუმამდე შემცირებულია.
„საქართველოში მოქმედი, თუმცა უცხოეთში რეგისტრირებული და შესაბამისად, იქ მათი უცხოური პატრონაჟის ქვეშ მყოფი მედია (მათ ბევრი იცნობს) უკვე წლებია ეწევა საქართველოს გაშავების კამპანიას.
მე ვეტყოდი სუს-ს, რომ ადრე იყო საჭირო მათი გამოვლენა და ამაზე რეაგირება. არაერთი ფბ-პოსტი მაქვს ამაზე და არა მხოლოდ მე. ეს ის ონლაინ მედიასაშუალებებია, ანტისამთავრობო მიტინგებზე რომ დარბიან.
კარგია, რომ ახლა მოხდა რეაგირება. როგორც იტყვიან, ჯობს გვიან, ვიდრე არასდროს, მაგრამ ვისურვებდი, რომ ამ რეაგირების შედეგად, დაიდოს კონკრეტული გაზომვადი შედეგი, რომელიც გვეტყვის რომ პრობლემა მოხსნილია ან მინიმიზებული. არადა, პრობლემა სერიოზულია!“ - წერს ანჯაფარიძე.
| სარეკლამო ადგილი - 11 650 x 60 |
