1
19 იანვარი 2024, 15:12
„ხალხის ძალის“ წევრი თამთა მეგრელიშვილი პარლამენტის თავმჯდომარის, შალვა პაპუაშვილის განცხადებას, რომლის მიხედვითაც ოპოზიციას სურს საქართველო იყოს ბორანი ევროპასა და აზიას შორის, რომელსაც, ვისაც უნდა მიაწვება და ერთი ნაპირიდან მეორეზე გადააყვანინებს თავს, მაშინ, როცა „ქართული ოცნება“ საქართველოსგან ხიდს ქმნის ევროპასა და აზიას შორის, სოციალურ ქსელში ეხმაურება.
თამთა მეგრელიშვილი აღნიშნულს ეთანხმება და სოციალური ქსელის მომხმარებლებს კიდევ ერთხელ ახსენებს, რა გზა განვლო საქართველომ გლობალური სატრანზიტო მაგისტრალების რეალიზება-განვითარებაში.
„აბრეშუმის გზაზე მდებარეობამ უმნიშვნელოვანესი ფუნქციით დატვირთა საქართველო.
წლების განმავლობაში რუსეთის ენერგორესურსებზე დამოკიდებული ევროპა ალტერნატიულ მიმწოდებლებს ეძებდა და სწორედ საქართველოზე გატარდა დღეს უმნიშვნელოვანესი მილსადენები: ბაქო-თბილისი-ჯეიჰანის ნავთობსადენი, რომელიც მსოფლიო ბაზრებს კასპიის ნავთობს აწვდის და გაზის სამხრეთის დერეფანი, რომელსაც ევროპის ქვეყნებისთვის ახალ გეოპოლიტიკურ ვითარებაში სასიცოცხლო მნიშვნელობა აქვს.
ასევე, მნიშვნელოვანი პროექტია განხორციელების პერსპექტივით ანაკლიის ღრმაწყლოვანი პორტი, რომლის აშენების შემდეგ ეს იქნება შავი ზღვის აღმოსავლეთ ნაწილში ერთადერთი ღრმაწყლოვანი პორტი 10 000-კონტეინერიანი ტანკერების მისაღებად.
აბრეშუმის დიდი გზის საქართველოს მონაკვეთზე ბოლო წლებში, ასევე, მნიშვნელოვანი სარკინიგზო პროექტი განხორციელდა - ბაქო-თბილისი-ყარსის რკინიგზა. ამ მაგისტრალით, გარდა იმისა, რომ აზერბაიჯანის დედაქალაქი ბაქო თბილისსა და შემდეგ თურქეთის ქალაქ ყარსს უკავშირდება, უნიკალური მარშრუტი შეიქმნა. დღეს უკვე შესაძლებელია უმოკლეს დროში ჩავიდეს საკონტეინერო მატარებელი ჩინეთიდან ევროპის უკიდურეს დასავლეთში – ლონდონში. ამ რკინიგზას „აბრეშუმის რკინიგზასაც“ უწოდებენ, რომელზედაც ელექტროტექნიკით დატვირთული პირველი ჩინური საკონტეინერო მატარებელი 2015 წლის 13 დეკემბერს შედგა და სატესტო მარშრუტი დანიშნულების ადგილამდე წარმატებით გაიარა.
საერთაშორისო დანიშნულების ეს სარკინიგზო მაგისტრალი ოფიციალურად 2017 წლის 30 ოქტომბერს გახსნეს საქართველოს, აზერბაიჯანისა და თურქეთის ლიდერებმა.
საქართველო მნიშვნელოვან როლს ასრულებს გლობალური სატრანზიტო მაგისტრალების რეალიზება-განვითარებაში, მონაწილეობს ეკონომიკურ პროცესებში და რეგიონის ენერგოუსაფრთხოების უზრუნველყოფაში და შუა დერეფანზე, იგივე აბრეშუმის გზაზე გაზრდილი მოთხოვნა, რომელიც კულტურის, მეცნიერებისა და ტექნოლოგიების მდინარეა საქართველოსთვის, კიდევ უფრო ახალ შესაძლებლობებს აჩენს, რომელთა გამოყენებისთვისაც კონკრეტულ სახელმწიფოებთან ეკონომიკური თანამშრომლობა აუცილებელი იქნება და ამ შესაძლებლობებს ქართული სახელმწიფო გამოიყენებს.
მინაწერი: ოპოზიციის დიდი სურვილის მიუხედავად, ქართული სახელმწიფო არ იქნება ბორანი, რომელსაც სახელმწიფოები საკუთარი სურვილისამებრ გამოიყენებენ - მიაწვებიან და ერთი ნაპირიდან მეორე ნაპირზე თავს გადააყვანინებენ.
ქართულ სახელმწიფოს, „ქართული ოცნების“ ჭკვიანი პოლიტიკით, ექნება კარგად გამოკვეთილი, ღირსეული ადგილი ყველა სხვა სახელმწიფოს გვერდით, რომლებიც ევროპასა და აზიას შორის არსებული „ხიდით“ სარგებლობას მოინდომებენ“, - წერს თამთა მეგრელიშვილი.
| სარეკლამო ადგილი - 11 650 x 60 |
