Bloomberg-ის მიერ დამუშავებული ბოლო მონაცემებით, წელს ევროპაში ექსტრემალურ სიცხეს 25 000-ზე მეტი ადამიანი ემსხვერპლა.

რობერტ კოხის ინსტიტუტის მონაცემებით, მსხვერპლის ყველაზე მაღალი მაჩვენებელი გერმანიაში დაფიქსირდა - აპრილის შემდეგ სიცხით გამოწვეულმა ჭარბმა სიკვდილიანობამ 11 900-ს მიაღწია.

ესპანეთის, საფრანგეთის, დიდი ბრიტანეთის, შვეიცარიისა და ნიდერლანდების სახელმწიფო უწყებებისა და კვლევითი ცენტრების ცნობით, რეგიონში სიცხესთან დაკავშირებული გარდაცვალების შემთხვევების რაოდენობამ 25 000-ს გადააჭარბა.

მიმდინარე ზაფხულს დასავლეთ ევროპა სიცხის ოთხმა მძლავრმა ტალღამ მოიცვა, რამაც ტემპერატურული რეკორდები მოხსნა და ეკონომიკურ აქტივობას დარტყმა მიაყენა. სიცხე მომავალ კვირას კვლავ მოიმატებს, რა დროსაც ოთხშაბათისთვის ლონდონში 34°C, ხოლო პარიზში 38°C-მდე ტემპერატურაა პროგნოზირებული.

მაღალი დღე-ღამური ტემპერატურა და მაღალი ტენიანობა განსაკუთრებულ საფრთხეს უქმნის მოწყვლადი ჯგუფების ჯანმრთელობას. სიცხის ხანგრძლივმა ზემოქმედებამ შესაძლოა თავბრუსხვევა, გულისრევა და კუნთების სპაზმი გამოიწვიოს, რაც ხშირად სითბური დაკვრითა და ფატალური შედეგითაც კი სრულდება.

სიცხით გამოწვეული ჭარბი სიკვდილიანობის შეფასება ხდება გარკვეულ პერიოდში გარდაცვლილთა რაოდენობის შედარებით გასული წლების ისტორიულ საშუალო მაჩვენებლებთან. სამთავრობო სააგენტოებისა და კვლევითი ინსტიტუტების მიერ გამოქვეყნებული მონაცემები დაგვიანებით იწერება და ჯერ არ ასახავს სიცხის ბოლო ტალღას, რომელიც აგვისტოს დასაწყისში დაიწყო.