1
10 სექტემბერი 2025, 12:06
ექსპერტი, ზაალ ანჯაფარიძე სოციალურ ქსელში ეხმიანება და ამხელს ორმაგ სტანდარტს, რომელსაც დასავლეთი საქართველოსთან მიმართებაში იყენებს. მაგალითად კი ტრამპის მრჩევლის, პიტერ ნავაროს საქმე მოჰყავს, როდესაც მას კონგრესის კომიტეტში ოფიციალური დაბარების იგნორირებისა და კონგრესის უპატივცემულობის გამო 5 თვიანი პატიმრობა მიუსაჯეს.
ანჯაფარიძე აცხადებს, რომ როდესაც საქართველოში, ოპოზიციის ზოგიერთ ლიდერს იგივე დანაშაულისთვის პატიმრობა შეეფარდა დასავლეთში აღნიშნულ საკითხზე მაშინვე ხმაური ატყდა.
მისივე თქმით, მსგავს პირობებში რთულია საუბარი პარტნიორობაზე.
„პიტერ ნავარო არის დონალდ ტრამპის მრჩეველი. იცით რა კავშირი აქვს მის საქმეს საქართველოს ამბებთან? ბევრმა ალბათ არ იცის და ამიტომ საჭიროდ ვთვლი ავხსნა, რომ გავიგოთ რეალურად როგორია აშშ-ს და არა მხოლოდ, დამოკიდებულება საქართველოსთან.
როდესაც 2020 წელს ტრამპმა არჩევნები წააგო, ნავარომ განაცხადა არჩევნების ფალსიფიკაციაზე, რომლითაც ტრამპს გამარჯვება მოპარეს. 2022 წელს მან უარი განაცხადა ჩვენება მიეცა კონგრესის სპეციალური კომიტეტის წინაშე თეთრ სახლზე 2021 წლის იანვარს თავდასხმის საქმეზე. მისი საქმე იუსტიციის სამინისტროს გადასცეს, მას ბრალი წაუყენეს და კონგრესის კომიტეტში ოფიციალური დაბარების იგნორირებისა და კონგრესის უპატივცემულობის გამო 5 თვიანი პატიმრობა მიუსაჯეს.
თუმცა, როდესაც ჩვენთან ზუსტად იგივეს გამო ოპოზიციის ცალკეულ ლიდერებს პატიმრობა შეეფარდათ, დასავლეთში მყისვე ხმაური ატეხეს - ეს როგორ შეიძლება, დაუშვებელია და ა.შ. დაახლოებით იგივე რაც FARA-ს კანონზე მოხდა. ჩვენ გვაქვს, თქვენ არ უნდა გქონდეთ.
თუ შეეკითხები რატომ უნდა იკრძალებოდეს საქართველოში ის რაც დასაშვებია თქვენთან ? გიპასუხებენ „იმიტომ.“ თუ უფრო ჩაეკითხები, გეტყვიან ჩვენთან შეიძლება, მაგრამ თქვენთან არა, იმიტომ რომ ჩვენ ვართ ჩვენ, თქვენ კი ხართ თქვენ. ჩვენ ვართ იმპერატორი, თქვენ კი ხარი.
ასეთი დამოკიდებულების პირობებში რა თქმა უნდა რთულია და შეუძლებელიც კი საუბარი პარტნიორობაზე, მითუმეტეს თანასწორუფლებიანზე“,- წერს ზაალ ანჯაფარიძე.
| სარეკლამო ადგილი - 11 650 x 60 |
