ის შეტევა, უხამსობა, ის მიზანმიმართული საქმიანობა, რომელიც მიმართულია ჩვენი ქვეყნის კულტურულ იდენტობასთან, ჩვენი ქვეყნის რელიგიურ იდენტობასთან, ადამიანებში იწვევს გარკვეულ პროტესტს, - განაცხადა „ქართული ოცნების“ დეპუტატმა, ირაკლი ქადაგიშვილმა ახალი მოძრაობის დაფუძნებასთან დაკავშირებით ოპოზიციის განცხადებებზე.

მისივე თქმით, ამ კონტრპროტესტის გამოხატვის უფლება და ამ ღირებულებების დაცვის უფლება ყველა ადამიანს აქვს.

„აქცენტი კეთება, რომ გინდა თუ არა ეს იქნება მოძალადეთა ჯგუფიო. მე ვფიქრობ, რომ ესეც შეგნებული დეზინფორმაციაა იმის გამო, რომ ერთ-ერთი დამფუძნებელი სპორტსმენია, მაშინვე ძალადობის იარლიყი მიაკრეს. ყველა ღირებულებას დაცვა სჭირდება, ღირებულებითი კონტექსტით“, - აღნიშნა ირაკლი ქადაგიშვილმა.

გიორგი ქართველიშვილი, თანამოაზრეებთან ერთად, ახალ მოძრაობას დღეს დაარეგისტრირებს. ორგანიზაციის დაფუძნებაზე განცხადება გუშინ გაკეთდა. გიორგი ქართველიშვილის თქმით, საინიციატივო ჯგუფი ქართული ღირებულებების, ფასეულობებისა და ტრადიციების დასაცავად აფუძნებს სახალხო მოძრაობას და უცხოეთიდან დაფინანსებული, გარე ინტერესების მონურ მორჩილებაში მყოფი, გაუკუღმართებული იდეოლოგიის მქონე ადამიანებისა და მათგან შემდგარი ჯგუფების წინააღმდეგ იწყებს ბრძოლას.