1
10 ოქტომბერი 2026, 10:17
მეცნიერებმა შექმნეს მელანი, რომლის ფერი სხვადასხვა ტიპის სინათლით იცვლება ან უხილავი ხდება.
იდეა ასეთია: ნახატი კანში რჩება, მაგრამ შეგიძლია დამალო და ისევ გამოაჩინო. ტექნოლოგიას PhotoTat ჰქვია და ჯერ განვითარების ეტაპზეა.
ტექნოლოგია PhotoTat კოლორადოს უნივერსიტეტის ბოულდერის მკვლევარმა კარსონ ბრუნსმა და მისმა კოლეგებმა შექმნეს. მათი კვლევა 9 ოქტომბერს ჟურნალ Matter & Light-ში გამოქვეყნდა.
მელანი შეიცავს სინათლეზე რეაგირებად საღებავებს, რომლებიც პოლიმერის - PMMA-ს - უმცირეს ნაწილაკებშია მოთავსებული. ამ მასალას სხვა სამედიცინო ტექნოლოგიებშიც იყენებენ.
როგორ მუშაობს? ულტრაიისფერი სინათლის ზემოქმედებით საღებავის მოლეკულური სტრუქტურა იცვლება და რამდენიმე წამში ფერი ჩნდება. ძლიერ ხილულ სინათლეს, მაგალითად კაშკაშა LED-ს, შეუძლია ფერი კვლავ გააქროს. სისტემაში ლურჯი, მაგენტა და ყვითელი საღებავებია, რომელთა შერევით სხვადასხვა ფერის მიღებაა შესაძლებელი.
მკვლევარმა საკუთარ თავზეც გამოსცადა: ფეხზე თევზის ქერცლების შავი კონტურები დაიხატა და მათი ნაწილი ახალი მელნით შეავსო. სინათლის დახმარებით ქერცლების ფერადი შიგთავსი ჩნდება ან ქრება; ჩვეულებრივი შავი კონტური კი ხილული რჩება.
ტექნოლოგიის ერთ-ერთი შესაძლო დანიშნულება სამედიცინო ნიშნულებია. სხივური თერაპიის დროს პაციენტებს ზოგჯერ პატარა მუდმივ ტატუებს უკეთებენ, რათა მკურნალობისას სხეულის საჭირო ადგილი ზუსტად მონიშნონ. PhotoTat-ით ასეთი ნიშნული შეიძლება ექიმთან ვიზიტისას გამოჩნდეს, დანარჩენ დროს კი უხილავი დარჩეს.
| სარეკლამო ადგილი - 11 650 x 60 |
