ანტისახელმწიფოებრივი, ანტიკონსტიტუციური პოლიტიკური პარტიები უნდა აიკრძალოს. ეს ასეულობით შემთხვევაში აქვს გაკეთებული ევროპის სხვადასხვა ქვეყანას, მათ შორის უკრაინას და მოლდოვას, თუმცა ვხედავთ ევროპიდან თითის ქნევას, რომ პარტიების აკრძალვა საქართველოს ევროკავშირთან დაახლოებას შეუშლის ხელს, - განაცხადა პარლამენტის ვიცე-სპიკერმა ნინო წილოსანმა გადაცემაში „დღის ქრონიკა“.
წამყვანმა ჰკითხა, რამდენად შეიძლება გავლენა მოახდინოს საკონსტიტუციო სასამართლოში 5 პარტიის აკრძალვის სარჩელზე მსჯელობამ და თეორიულად, სარჩელის დაკმაყოფილებამ ბრიუსელის დამოკიდებულებაზე საქართველოს ხელისუფლების მიმართ, რა მოლოდინი აქვს.
„ახლა იმ გამოწვევის წინაშე ვდგავართ, რომ საკონსტიტუციო დონეზე აკრძალული პარტიები ევროპის შემთხვევაში ნორმაა, ჩვენს შემთხვევაში - კრიტიკული კომენტარების გაკეთების წინაპირობა. ევროპაში 100-ზე მეტი პარტიაა აკრძალული ზუსტად იმ პრინციპებით, რაზეც ჩვენ ვაპელირებთ. პრინციპი ერთია, რომ ანტისახელმწიფოებრივი, ანტიკონსტიტუციური პოლიტიკური პარტიები უნდა აიკრძალოს. ეს ასეულობით შემთხვევაში აქვს გაკეთებული ევროპის სხვადასხვა ქვეყანას, მათ შორის უკრაინას და მოლდოვას, თუმცა ვხედავთ ევროპიდან თითის ქნევას, რომ პარტიების აკრძალვა საქართველოს ევროკავშირთან დაახლოებას შეუშლის ხელს.
2012 წლის შემდეგ, 14 წელი ვითმენთ ამ პარტიების არსებობას და ირონიულად და ცინიკურად ამ პარტიებს ოპოზიციას ეძახიან მაშინ, როდესაც ამაზე უფრო მავნებლური და ანტიქართული დაჯგუფებები არ არსებობს. ერთხელ და სამუდამოდ უნდა ვთქვათ უარი ამაზე და გავაჯანსაღოთ პოლიტიკური ველი“, - აღნიშნა წილოსანმა.
| სარეკლამო ადგილი - 11 650 x 60 |
