პოლონეთის სამხრეთში მდებარე ქალაქ კრაკოვის მთავარ მოედანზე სროლის შედეგად დაღუპულთა რიცხვი გაიზარდა - ბოლო მონაცემებით, ოთხი ქალი და ორი კაცი დაიღუპა. პოლიციამ ეჭვმიტანილი ცეცხლსასროლი იარაღით დაჭრა და დააკავა, - იუწყება Reuters-ი.
თავდასხმის შედეგად კიდევ 15 ადამიანი დაშავდა, მათ შორის ორი პოლიციელი, რომლებიც ეჭვმიტანილთან მომხდარი სროლის დროს დაიჭრნენ. ერთ-ერთი პოლიციელის მდგომარეობა მძიმეა. სამართალდამცველების ინფორმაციით, თავდამსხმელს სამხედრო სტილის ტანსაცმელი ეცვა და სამხედრო დანიშნულების იარაღი ჰქონდა.
კრაკოვის პოლიციამ სოციალურ ქსელ X-ში დაწერა, რომ სავარაუდო თავდამსხმელი პოლონეთის 24 წლის მოქალაქეა. „ინციდენტის ერთადერთი ცნობილი ჩამდენი პოლიციის პატიმრობაში იმყოფება“, - ნათქვამია პოლიციის განცხადებაში. სროლის მოტივზე სამართალდამცველებს ინფორმაცია არ გაუვრცელებიათ.
პოლიციის ცნობით, შეტყობინებების მიღება ადგილობრივი დროით დაახლოებით 15:00 საათზე დაიწყეს. ინფორმაცია ეხებოდა თავდამსხმელს, რომელმაც პოლონეთის სიდიდით მეორე ქალაქის, პოპულარული ტურისტული ცენტრის მთავარ მოედანზე ავტომობილიდან ცეცხლი გახსნა და ადამიანებს უმისამართოდ ესროდა. თავდაპირველად გავრცელდა ინფორმაცია, რომ სროლის შედეგად 5 ადამიანი დაიღუპა.
| სარეკლამო ადგილი - 11 650 x 60 |
